Fai unha temporadiña que tiña ganas de coñecer a zona da Pesqueria do Tambre, e aproveitando que organizaron unha ruta de sendeirismo en Deportes da USC, apunteime e liei un par de compañeiros mais.

Comezamos as 10.30 en Pontenafonso (1ª foto) e camiñamos por pistas atravesando aldeas. Esta parte foi a menos bonita da ruta. Logo de chegar a igrexa de Roo seguimos paseando xa polo medio de montes e fincas. Chegamos a Central do Tambre II e despois de un par de km a Central do Tambre I (última foto).  Aquí comeza a parte mais bonita do percorrido. Por camiños, pasarelas de madeira (2ª foto) e sendeiros de pescadores chegamos a desembocadura do rego de Quarenza. Ata aqui a ruta está perfectamente marcada, xa que pertence o itinerario PRG11. Dende aquí demos volta de novo ata a Central onde aproveitamos para atravesar a ponte colgante (3ª foto) e descansar mentras esperabamos polo autobus que nos traeria de volta a Santiago.

A Central Hidroelectrica do Tambre I  está asentada sobre unha antiga pesqueria que abastecia os monxes do Mosteiro de S. Xusto, a uns 5km. Moito tempo despois, a comezos do século pasado (1924) a "Sociedad Gallega de Electricidad" encargou a sua reforma obtendo o edificio que temos agora. Dende o Embalse Barrié de la Maza desviaron parte do cauce do rio pola parte alta da montaña, para logo deixala caer na Central e obter electricidade. No recinto podemos ver algunha bomba antiga xa xubilada. Fai poucos anos restauraronse as casas do antigo poblado da Central e convertironse en estancias do Hotel Pesqueria del Tambre.